Hulō! Hulō! He nūhou hoʻohauʻoli. Aloha mai kākou e nā makamaka heluhelu o ka Hōkū Buletina, ka mea nona ka hoʻoheno ʻia e waiho maila ma ka ʻaoʻao mua o kēia helu. Eia mai kahi kolamu hou i kākau ʻia ma ka ʻōlelo kanaka, ka ʻōlelo ʻōiwi hoʻi o nēia paeʻāina, a e hōʻike ana nō hoʻi i nā manaʻo like ʻole a ma nā ʻano like ʻole hoʻi no ka nī nau nui a me ka nī nau iki o ke ao nei. A ʻo ka mea e hū wale aʻe ai ka hauʻoli, ʻeā, ʻo ia hoʻi, ʻo ua ʻōlelo kanaka lā i aloha nui ʻia, e puka mau ana ma ʻaneʻi iho nei nō i kēlā me kēia Lāpule.
E kapa ʻia ana ka inoa o kēia kolamu ʻo Kauakūkalahale ʻoiai ʻo ke Kulanui ʻo Hawaiʻi ma Mānoa kona wahi i hoʻokumu ʻia mai ai a mohala aʻe a launa mai hoʻi me nā luna ʻoluʻolu o ka Hōkū Buletina ma lalo o ke kūlanakauhale ʻo Honolulu, kahi alahula o ia ua. Ke lana nei naʻe ka manaʻo e nihi aku auaneʻi kēia ua a kū ma nā kala hale a pau mai ʻō a ʻō o ko kākou paeʻāina nei.
E kala loa ka paʻi ʻia o kekahi kolamu ʻōlelo kanaka ma loko o nā nūpepa puka lā o Hawaiʻi nei, he kanalima paha makahiki a ʻoi iki aku, a he nui ka mahalo i nā kūpuna o ia mau makahiki ma mua akula i ʻaʻapo maila i ia mea he kākau palapala a i hoʻoikaika hoʻi i ka hōʻike ʻana i ko lākou mau manaʻo no ka noho ʻana o ia wā, a waiho nui mai nei me kākou ia mau manaʻo a hiki i kēia lā. He nui hoʻi ka mahalo i ka poʻe nāna i hoʻoikaika i ka hoʻāla hou ʻana i kēia mea he kākau moʻolelo ma loko o ka ʻōlelo Hawaiʻi. Ua ola nā mamo iā lākou.
Ke luʻuluʻu nei kahi naʻau i ka hala ʻana o ko kākou hoa i aloha nui ʻia, ʻo Māhealani Dudoit, ka luna nui o ke Kuleana ʻŌiwi Press, ua hala loa i ke ala hoʻi ʻole mai. Ma muli o kona akamai a me ka ʻonipaʻa hoʻi i hoʻokumu ʻia ai ua puke kumuhana lā i ala e puka ai nā manaʻo o ka poʻe ʻōiwi ma o kā lākou ʻōlelo lā e koho ai, ʻo ia hoʻi ʻo ka ʻōlelo paʻiʻai, ka ʻōlelo haole, a pau pū nō hoʻi me ka ʻōlelo ʻōiwi o nēia ʻāina.
Eia hoʻi ka manaʻo panina o kēia kolamu. E ʻole ka hoʻomanawanui ʻana o nā makamaka he nui hewahewa i nā haʻawina o ka hoʻopaʻa ʻana aku nei a paʻa pono hoʻi iā lākou ua ʻōlelo aloha nei o kākou, kupu mai nō kēia wahi kolamu,ʻo Kauakūkalahale, i ʻīnaʻi e moni ai ka haʻae. A no laila, na kākou nō kēia wahi iʻa e hōʻonoʻono aku i kēlā me kēia pule ma ka hoʻouna ʻana mai i nā manaʻo like ʻole i kākau ʻia ma loko o ka ʻōlelo Hawaiʻi. A inā he wahi hakahaka ko ke kino o Kauakūkalahale, na ia manaʻo nō e hoʻopiha aku.
