October 27, 2002

(Click here
if no image display)

Hawaiian-English       concordance       English-Hawaiian      
introduction     counts     index     reverse index     references     topical     texts
 a    e    h    i    k    l    m    n    o    p    u    w   

Kauakūkalahale

Honolulu Star-Bulletin

November 3, 2002

He aloha no... Keawe Lopes

Kekeha Solis

This article is about Robert Keawe Lopes Jr., a Hawaiian language instructor at the University of Hawai'i at Mānoa, and his debut CD that has been recently released. Lopes is from Nānākuli and is presenting his own musical compositions on the CD.

November 10, 2002



 

Aloha mai e nā makamaka heluhelu o Kauakūkalahale. Inā e ʻike ʻia kona poʻo e kiʻei aku ana ma ko ʻoukou mau home i kēlā me kēia Lāpule, e heahea mai a e hoʻokipa, a e luana ma kona mau moʻolelo e uluwehi mau ana.

He pā CD hou! He pā CD hou!! Eia nō ia ke waiho iho nei ma nā haka kau o nā hale kūʻai a i kapa ʻia kona inoa ʻo "He Aloha No ... Keawe Lopes". ʻEā, i kēia mau lā, he kākaʻikahi nā pā CD i piha i nā mele ʻōlelo Hawaiʻi. A ʻo nēia pā CD, he 10 ona mele ʻōlelo Hawaiʻi, a hoʻokahi wale nō ona mele hapa Hawaiʻi. A ua hāʻale hoʻi nei ʻapu i ka wai ʻono momona a ka launa ʻole mai. He ʻono auaneʻi ia e poina ai ka inoa.

ʻAuhea ʻoukou e nā ʻōlapa, he piha nō nei pā CD i nā mele e ʻolu ai ke kino i ka hula, a e leʻa ai ka lima i ka hoʻokani, e like hoʻi me ke mele ʻelua i kapa ʻia ʻo "Aloha Nānākuli", he mele pana, kahi i hoʻoheno ai ʻo ia i kona ʻāina i hānai ʻia ai, "Aloha Nānākuli kuʻu home nani."

A na Keawe a me kāna aliʻiwahine, ʻo Kaʻōnohilani, i haku i ka nui o nā mele a he kū nō ia mau mele i ke ʻano o nā mele i haku ʻia i ke au i hala aʻe nei, e like hoʻi me ke mele hoʻokahi o kēia pā CD i haku ʻole ʻia e lāua nei, na ka hoahānau o ke kupunawahine o Keawe nō ia mele i haku, ʻo ia hoʻi ʻo Bill Aliʻiloa Lincoln. A pēlā pū nō hoʻi me ke ʻano o ke mele ʻana o Kimo Alama Keaulana, kāna kumu hula, me kona hui ʻo Lei Hulu.

He puʻukani leo nahenahe kēia i hānau maila na Robert a me Mary Ann Lopes ma ka lā 4 o ʻApelila, a ʻaʻohe wahi mea a hoʻomaopopo iki o nā mākua ē e kō ana ka ʻōlelo a kahiko no kahi kanaka nona ka leo nahenahe, ʻo ia hoʻi, "ʻo Kaʻaona ke kāne, ʻo Laʻioeoe ka wahine, hānau ke keiki, he keiki leʻa i ke oli" a me ke mele nō hoʻi kekahi. A i ke kāʻalaʻala ʻana aʻe o ua keiki nei a nui, ʻaʻole naʻe i hiki i "ka nui e ʻauamo ai i ke keiki i ke kua," i lilo mai ai ʻo Keawe i hoa ʻōlelo no nā manu leo leʻa o kuahiwi. He kumu ʻōlelo Hawaiʻi ʻo ia nei no ke Kulanui o Hawaiʻi ma Mānoa, a ʻo ia keʻena, ua hele a hoʻolaukanaka i ka leo o ia manu kapalili aloha, he ʻolina leo. Ma ua Kulanui nei nō kahi i launa pū ai ʻo Keawe me kona hoa manu a "ua sila ka pelika" i ka makahiki 1999. Ua pōmaikaʻi hoʻi lāua nei i kā lāua mau kaikamāhine ʻelua, ʻo Piʻikea lāua me Kaʻōnohikaumakaakeawe.

A i kēia Pōʻalima e hiki mai ana, ka lā 8 hoʻi o Nowemapa, e naue aku kākou e nā makamaka heluhelu i ka Hemenway Courtyard, ma ke Kulanui o Hawaiʻi ma Mānoa, a ma laila e nanea ai ka pepeiao i nā "kāhuli leo leʻa o ka nahele" o ka uka o Mānoa, kahi e ulu nei ka "Lehua Kea", ma ka "Nani o ua pō" nei, ʻoiai, ʻo nei puʻukani, e hoʻomākaʻikaʻi mai ana i ka nani o kona mau ʻāina aloha.

A ʻo ia ihola, i lohe ʻoukou. Eia nō ko Mānoa keiki ke hoʻi akula, ua ahiahi.

E hoʻouna ʻia mai nā leka iā māua, ʻo ia hoʻi ʻo Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ʻole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawaiʻi at Mānoa.

 

custom counter